Tuesday 31 May 2011

LASAMA KESTIONA PROFESIONALIZMU UNPOL NO UNMIT HADIA KARRETA PN 1


Tempo Semanal, 31/05/2011

Spanduk ne'e tarah hela iha parede besik bemori
kestiona UNPOL nia kapasidade
hafoin deskonfia membru PNTL ida,
 tiru mate Kuka iha Delta Nova 2009.  
Iha dader loron sabado (28/05) karreta PN 1 ne’ebe sa’e husi Prezidenti PN, Fernando de Araujo Lasama hetan soke husi ninia eskolta UNPOL. Iha insidenti ne’e karreta Prezidenti Parlamentu nasional ne’ebe mos hanesan ulun bo’ot Parti Demokratiku ne’e hetaan estragus balun no vice Ministru Edukasaun Paulo Asis sofre kanek iha area besik matan ninian. “Ha’u nia kareta soke UNPOL ne’ebe foo seguransa mai hau soke husi kareta nia kotuk,” Dehan Lasama.

Lasama lamenta tebes ho kualidade UNPOL iha nasaun ne’e no preokupa ho seguransa VIP sira ne’ebe maka hetaan seguransa husi polisia UNMIT hodi dehan, “Nia hanesan pengawal, tuir loloos nia labele halai besik liu. Tan ba estarada kuak barak. Tan ba ne’e ha’u lamenta ba UN haree polisia Unpol sira ne’e. Se sira labele karik keta foo lai servisu ba sira atu akompania VIP, tan ba akontesimentu ne’e sira mak oho fali VIP sira.”

Prezidenti parlamentu Nasional ne’e ezije organizasaun Mundial ne’e atu hadia fali karreta PN 1 no dehan nis sei la gasta osan povu ninian hodi hadia karreta ne’e estraga tan ba imkapasidade UNPOL sira ninian.

“Ha’u husu ba UN  para hadia kareta ne’e. Ha’u labele hasai osan estadu nian hodi hadia fali hahalok husi ema ne’ebe ladun iha atensaun tuir professional,” ezije Lasama.
Wainhira jornal ne’e konfirma ho Xefe Gabinete Prezidenti PN, Marcelino Magno konfirma katak,” ohin dadersan sira husi parte UNMIT mai foti ona kareta atu lori ba hadia iha ofisina.”

Iha parte seluk wainhira jornal ne’e husu klarifikasaun ba porta voz UNMIT ninian dehan ninia parte seidauk hatene.

Tempo Semanal tenta konfirma ho komandante UNPOL maibe rejeita atu responde ba deklarasaun Prezidenti Parlamentu Nasional ninian no husu atu jornal ne’e konfirma fali ho Porta Voz UNMIT ninian.

Besik tuku 15.00 Jornal ne’e koko konfirma hikas ho Ms. Sandra McGuire ne’ebe dehan katak UNMIT iha ona pozisaun ofisial hodi hataan ba Prezidenti Lasama ninia preokupasaun maibe dehan preokupa hela ho enkontru ruma iha UNMIT kaikoli no dehan atu jornal ne’e bele publika artigu mak iha. “Aban mak ha’u haruka press release ne’e ba imi,” dehan lian na’in UNMIT ne’e via telefone.

Maibe iha tuku 15:42 tempo Semanal simu SMS husi lia na’in UNMIT ninian ne’e dehan, “ami sei hadia karreta ne’e.”

Ba jornal ne’e Sra. McGuire relata UNMIT haruka ona ekipa tekniku ruma ba haree kondisaun karreta Prezidenti lasama ninian no tuir fontes Jornal ne’e iha Parlamentu Nasional dehan UNMIT ne’ebe tauk hela Lasama ne’e negosia atu sosa karreta foun id aba Prezidenti lasama maibe gabinete Lasama mak husu atu hadia de’it.

Iha lorokraik tuku 17.00 liu, Tempo Semanal simu telefone ida husi Sr. Kakuk ofisiais relasaun publika ida iha UNMIT hodi husi diresaun email jornal ne’e ninian. Hafoin konfirma tiha diresaun email UNMIT la’os esplika preokupasaun profesionalizmu UNPOL ninian maibe repete hikas lia fuan atu hanesan ho SMS, McGuire, “UNMIT kontaktu ona ho gabinete Prezidenti Parlamentu Nasional ninian. Karreta ne’e hetaan estragus agora iha ona ofisina UN ninian. Tekniku sira haree hela estragus hirak ne’e no UNMIT sei selu hodi hadia fali karreta ne’e.”

To’o notisia ne’e hatuun UNMIT sei subar nafatin iha kanku kaikoli nia leet kona ba UNPOL sira nia frakasu ba publiku kona ba sa medidas mak sei hola ba UNPOL ne'e, wainhira organizasaun Mundial ne’e sempre ezije estadu no Governu Timor Leste atu bele tranparente ba publiku kona ba kauza ruma. (*)

3 comments:

Anonymous said...

Lasama mos tenke husu nia eskoltu sira rasik nebe dala barak arogante liu..! o nia kondotor no ESKLTO sira ne professional duni ga lae?

Anonymous said...

Staff Internacionais sira dala barak mak hanesan Kanko Kaikoli,, mai tiha iha Timor mak foin aprende fali ho Timor oan sira,,, depois aprende tiha ho Timor oan sira, dehan sira maka halo buat hotu-hotu; na realidade staff internasionais sira husi UNMIT barak mak KANKO HANESAN KANKO KAIKOLI,,,

Anonymous said...

Staff Internacionais sira dala barak mak hanesan Kanko Kaikoli,, mai tiha iha Timor mak foin aprende fali ho Timor oan sira,,, depois aprende tiha ho Timor oan sira, dehan sira maka halo buat hotu-hotu; na realidade staff internasionais sira husi UNMIT barak mak KANKO HANESAN KANKO KAIKOLI,,,