Tuesday 1 March 2011

Horta Apelu Dame, Arte Marsiais Hafuhu Malu Nafatin


Tempo Semanal-Dili, 28.02.2011

Sexta feira (25/02) semana kotuk iha sub distritu Laga iha Urna Dom Bosco ninia prezensa, Prezidente da Republika Dr. Jose Ramos Horta apela ba grupo artesmarciais iha Timor Leste nia laran tomak atu kaer metin dame no unidade nasional tuir ixemplu Santo mestre bo'ot jovens sira nian ne'e, hodi nune’e nasaun nia futuru bele sai diak liu. 

Grupu arte marsiais ida treina hela iha GMT Dili
“Hau halo apelu ba imi grupu arte marsiais hotu iha Timor laran tomak ho imi nia kbit no espiritu juventude nian, hau husu atu imi bele hametin liu-tan dame iha Timor Leste.” Apelu Xefi Estadu. 

Iha biban ne’e, Xefi Estadu husu mos ba joventude sira atu aumenta sira nia kapasidade hodi buka estuda nafatin no labele kaer kroat hodi labele estraga sira nia futuru rasik, tamba tuir Xefe Estadu nia hanoin katak futuru so bele hela deit ba juventude sira ne’ebe buka estuda halo esforsu maka’as iha sira nia vida, no futuru ne’e sei la sai nudar partense ba jovem hirak ne’ebe mak gosta kaer kroat. 

"Buka estuda lor-loron tamba futuru nasaun ne’e partensia husi ita bot sira, maibe liu- liu partensia deit ba sira nebe mak estuda.no halo esforsu maka’as iha sira nia moris, maibe ba sira ne’ebe la estuda, sira sei la hetan futuru ne’ebe diak, ita bele ko’alia barak, halo protesta oi-oin, maibe rezultadu ita hetan deit, se ita estuda,” apelu Xefe Estadu.

Iha okaziaun ne’e, Prezidente da Republika hodi Estadu nia naran agardese tebes ba komunidade Salesiano sira iha Timor-Leste no iha mundu ne’ebe durante ne’e hala’o ona servisu maka’as hodi forma juventude sira sai ema ne’ebe dedikadu.

Ikus liu Xefe Estadu hein katak ho inisiativa lori Urna Dom Bosco mai Timor-Leste ne’e bele lori no habelar liu-tan mensajen dame no domin iha Timor oan sira nia let. Vizita Xefe Estadu hodi partisipa missa Urna Dom Bosco iha sub distrito Laga hetan konvite husi Padre Parokia Sao.Joao Bosco Laga.

Maibe iha parte seluk iha besik liu Dili tuir fontes Tempo Semanal iha PNTL dehan iha ema foin sa'e lubun ruma maka halibur aan hela iha oeste Dili ninian. Iha meadu Dezembru 2010 mosu konfrontasaun ida entre grupu arte marsiais bo'ot rua iha Tibar hodi hamate ema ida nune'e mos iha parte Distritu ermera.

Iha semana kotuk membru arte marsiais ida hetan sona mate iha merkadu Komoro ninian no Polisia to'o ohin loron sei duni hela suspeitu ida ne'ebe mos membru ba arte marsiais seluk. (TS)

No comments: