Saturday 22 January 2011

HADAU MALU RAI MAUN-ALIN REZOLVE HO KATANA EVARESTU LAKON MORIS

Tempo Semanal-Ermera, 21.01.2011
Vitima Evaristo Soares tinan 49,ho nia kaben Hermenegilda Martins husi suco Railako Kraik,aldeia Fatukado,sub-Distritu Railako,Distritu Ermera iha loron sanulu resin tolu fulan janeiru tinan rihun rua sanulu resin ida(13/01/2011)iha tuku 09:00 otl kalan vitima nain rua hetan ataka husi ninia Maun-alin rasik(MRC,MG,JC) ne’ebe mak rejulta vitima nain rua monu iha fatin akontesimentu tanba kanik todan.

Tuir sasin nebe mak hatoo husi xefe Joventude suko Railako kraik,aldeia fatukado MOISES KODI esplika katak iha tuku sia kalan hau rona ema haklalak. Haklalak ne’e mai husi suspeitu nia uma ne’ebe ho distancia metro 50 resin ba vitima nia uma. Iha altura ne’eba hau rona ema balun hakilar dehan”hau mate ona,” momentu ne’eba hau halai sai mai, tanba hau nia uma ba fatin akontesimentu metro 15, entaun hau too iha fatin, hau hare deit vitima nain rua Evaristo ho Hermenegilda monu hela ba rai ho kanek todan. I altura ne’eba hau hare deit MRC mak hamrik hela kaer ai 5x7 iha ninia liman. Ema seluk hau laduun koeinese tanba kalan, entaun momentu ne’eba tan ba tauk hau halai sai ho metro 40 hodi kontaktu ba xefe do suko liu husi telefonemas. Hau informa kedas kazu ne’e ba xefe suko, I hau rasik to dereitamente ba xefe suko Domingos nia uma.

Tuir xefe Joventude ne’e, nia hatene katak kazu ne’e akontese tanba hadau malu rai entre sr.Evaristo ho Mrc.

Entertantu iha parte hanesan tuir xefe aldeia Fatukdo Joao Clementinho haktuir katak kazu ne’e akontese iha ninia uma oin, altura ne’eba iha kalan tuku sia hau iha hela uma laran, la kleur hau rona ema hakilar,entaun hau halai sai mai hau hare vitima nain rua monu ba rai, entaun hau hakilar dehan”agora hau telephone ba polisia task force, entaun ho ida ne’e sira komessa husik malu.

Tuir xefe aldeia ne’e nia hatene kazu ne’e akontese tanba hadau malu rai ne’ebe ho ninia luan besik hectares neen(6 hk). Tuir Joao nia kompriensaun katak toos ne’e durante tinan naruk Sr.Evaristo mak hadia hodi kuda aihan. Maibe iha fulan hirak liu ba familia MRC la sastifas hodi buka problema ho Sr.Evaristo, entaun kazu ne’e mai too autoridade suko atu rezolve tuir kultura no dalan familia ninian. Nia haktuir katak iha altura ne’eba parte rua konkorda atu rezolve tuir dalan familia ho kultura, maibe wainhira atu tama ba rezolve tuir kultura, husi suspeitu(MRC) la participa, maibe husi Sr.Evaristo soares pronto ona atu resolve, “tanba kazu ne’e husi parte suspeitu la participa entaun ami la konseque rezolve, I husi parte autoridade suko, intrega fila fali sasan ne’ebe mak husi parte Sr.Evaristo nian.

Kazu ne’e ami hatoo ou levanta ba autoridade Sub-Distritu Railako. Maibe husi parte autoridade sub-distritu dehan problema ne’e hein lai tanba iha sub- distritu okupado ho servisu barak, entaun ami hein deit.

Entertantu rejultado husi acontesimentu ne’e, iha data loron 15/01/2011 lokoraik Vitima Evaristo Soares husik iis ba dala ikus iha Hospital Nasional Guido Valadares Dili (HNGVD), I vitima ninia feen oras ne’e hetan hela tratamentu husi familia iha uma Railako (suko Lihu) tanba hetan baku iha parte ulun no isin lolon.

Mate isin Evaristo Soares iha data 16/01/2011 lokoraik entrega husi parte Hospital Nasional Guido Valadares ba familia matebian atu halao prosesu funeral. Tuir informasaun ne’ebe mak jornal ne;e hetan hatudu katak kazu ne’e agora dadaun tama ona ba prosesu tribunal, no suspeitu nain haat nebe mak deskonfia involve iha kazu refere oras ne’e polisia kaptura tiha ona. (TS/E T O)

No comments: